Cerpen karya Pdt. Arapen Perangin-angin (Mr. Hope)

Cerpen karya Pdt. Arapen Perangin-angin (Mr. Hope)

Thursday, 20 March 2008

Erga Diri Oleh: Mr. Hope “Kerpak….kerpuk…kerpak..kerpuk…..” terbegi sora gejek idur jambur nari. Jelma kiam kujah kujenda bagi kalak adon. “Nandei….! Kiamken….!Kiamken…..! Sampati…..! Saroi….!” I rumah nari lit ka sinungkun alu megang, sora diberu, kai e…. kai…kai? Empetna kal tah ban biarna, tapi la lit si megikenca. Eruklah labah ena! Ola ko kari gudamna,” nina ka sora si nggo agak metua bas jabu nari. Ibas jelma sienterem e teridah dua kalak anak perana sitinjun. Sada ras sidebanna desken petinju ngerebut gelar juara doni. Kaing... kaing.. kaing.... anak biang terdedeh kalak. “Matei ko...’ nina ka terbegi sora, sengget mungkin ia. Huntak sada kuta. Kedungenna mata kalak tertuju kubas si rubati e. Enggo mulai i teh kalak kai si jadi. Piga-piga perbapan si nguda ras si metua ndeherisa. “Ndoku dungi anak e.” “Engko leben kulunat.” “Kai denga begu? Ikomin!” “Engko begu. Katawari atem?”. age me si jabapen kalak e iherna cukais-cukais i rempu kalak. “Nggo, enggo mena! La lit gunana e,’ ninaka terbegi pudi nari. "Ningen pe meriah-meriah ibaskerja tahun enda,cuba kena ka rulah-ulah." “Pulahi min! Maka tanadai anak e ise aku.” “Ndekah me kutandai popom. Asa regen e di diateku ko.” “Ih...anak e...anak e...pulahi min. Ndaku tokup babahna e.” ggurpas kalak e duana. Panasen ia duana ikut pe si nagangisa maler panasna. Angin berngi si mbergeh e la ngasup nahan lasna pusuh kalak e. “Adi mekeng ia duana, tilanjangi saja kalak e. Kenca tamaken ku kantor pengulu ah, tah uga kin kari," nina sora perbapaan, mbuesa ia minem, lanai ranakenna je pe simehangkena. “Ma payo akap kena, ale?” nungkun ka ia man jelma sienterem, desken kampanye pemilu. Ise pe la ngaloi. Saja piga-piga tungkuk. Deba tutupna ka babahna alu kampuhna, tah uga akapna cakap mambur-mabur bage. Piah rukur ka tempa si ngeranai ndai. Dungna sinik. “Kai e?”, terbegi sora pudi nari. Sekalak perbapaan alu postur daging si mbestang, erbaju mbiring. Kumisna entelap kawes kemuhen. Matana ntelap natap pegancih duana si rubati e. Megi sora e, ipesalang kalak dalan man bana. Sinik kalak kerina. Si rubati e pe bagi manuk bernungen duana. “O, Berani, terusken kena gendangta e. Aturmu mehuli!” “Oe..Bulang.” “Eah baba kalak enda ku rumah. Langlang kari akap kalak,” nina iherna lawes. Ibaba kalak e me duana petinju la resmi e ku ingan si ikataken perkumis telap e. Bage lawes kalak e. “Horeee....gendang iterusken,” nina piga-piga danak-danak. “Sip koh..” nina nande-nande si ideherna, lang je nge ukurna. “Nggo ka kapko kita merga nggalar guna gendang enda, la sahun ningen ka. Rugilah,” nina ka sekalak ngerana janah nuntil. I rumah pengulu, ibas jabu bagian tengah enggo kimbang amak kawes kemuhen. Sada amak mbentar ikimbangken i tengah ngalaken kalak e duana. Ban lampu terang e enggo teridah maka piga-piga bagin lit besar ras lembam bas duana si rubati e. Bukna ras uisna pe lanai bo raturen. Sadar ia keadaanna ipekenana ka. Iusapna ayona, surina ka bukna salu jari-jari tanna. Bajuna pe ikancingna. Lit ka pe si enggo retap kancingna. La ndekahsa reh dua singuda-nguda mbaru mberkat pake jeans tapi rabit, menam la idah jeansna e. Sekalak maba cerek sada nari maba gelas salu ember mbiring. Minter sekalak namai gelas sidebanna ngisisa. Mberu kel tuhu singuda-nguda enda seh maka kerina neringkenca. Lit ka alu nangko-nangko. La ketadingen si rubati e pe, aminna tungkuk sesekali benterkenna tatapen man singuda-nguda e. “Tama tole permen, muas kal bengkilandu,” nina sekalak perbapaan. “Aku pe gi ntah, lain kuakap nanamna sendah,” nina ka sekalak anak perana. “Nggo mena bang,” nina si ngisi teh alu sitik salah tingkah. Kerehen perkumis telap, si kepeken pengulu e erbahansa suasana agak serius. Kundul ia mis bas amak mbentar si enggo isikapken. Minter ka itama singuda-nguda e gelas ras tehna. Arah e me kalak e lawes ban enggo serser dat teh. “Eah, minem kita. Kena duana lenga kuidah minem. Adi la kena minem lenga bo sibenaken percakapen enda, lah enggo teh kena,” nina pengulu iherna nirup tehna. Sitek kel incepna ban lasna. Megi cakap e la ndekahsa duana sirubati nengkap gelasna. Celnatkenna sitek ku biberna, mis ka amparkenna tehna. Banci jadi teh manis e pe meser ban enggo pecah nggusina. “Eak, engko lenga kap kutandai. Ise gelarmu, Nak?” nina pengulu man si kawes “Mintes, Bulang.” “Mintes, ija kutam?” “Berneh Mbelang.” “O.., ise bapam?” “Pa Rimbalang.” “Oh..enggo cocok kel. Tapi la ko pernah kuidah?” Sitatapen kalak kerina. “Ndekah aku Sulawesi, Bulang.” “O, patutlah,” nina pengulu janah engkusur sitek perkundulna ngalaken pak kemuhen. “Engko Rembang, tandaim kang Mintes enda?” “Lang,Bulang.” “Em, eak, kai kin sebabna maka kena rubati?” “Terdedeh aku nahena, Bulang, bagi gelarna e mintes aku isakkenna. Isakkenna ka kapndu kita lebe-lebe singuda-nguda ah, bene erga dirinta pe. Ngilas kuidah mis ka lah kuparap,” sitek kal bagi si senyum Pengulu. “Adi lebe-lebe dilaki ko isakkenna lakap bene rega dirim e? La ka ko megelut ari?” Sinik saja Rembang megi perkataan Pengulu e. “ Engko Mintes, payo nge kata Rembang ena ndai, tah lain ka bas engko nari?” “Payo, Bulang. Saja dedehna aku, pas kel bas kambal-kambal nahengku, ertumit ka sepatuna, kuskula seh kel suina Bulang. Emaka gelap kuidah, terisakken akulah. Parapna ka, ya kuparap ka lah.” Bagi si tawa deba simegi-megi ban ikataken sepatu Rembang ertumit. “Uga ka sepatu ertumit, sepatu diberu pake anak ena?” Gerrr.....tawa kalakkerina. Ayo Rembang ikut megara. “Bagi sepatu tintera pakena, Bulang,” nina ka lit menetralisir arah pudi nari. “Ooo... ningkalak kerina serentak la ikomandoi. Inem Pengulu ka tehna. Mulihi ka tenang kerina. “Engko Rembang, enca enggo kena rubati ndai, lit ka nge akapko naik rega dirim? Engko Mintes, enggo me kapmu puas kenca sitinjun ndai? Duana sinik kalak enda. “Persoalen kena duana la kap isengaja. Si Rembang terdedehsa, Mintes terisakkenna. Jadi la lit rekayasa dendam ras unsur kesengajaan. Cuma enda jadi pelajaren man kena ras man banta kerina. Bertindak atas nama erga diri enda pe arus hati-hati. Erga diri ninta, tapi besar kulanta, huntak si ban sada kuta. Kerja tahun si oratna inganta jumpa meriah salih jadi kebiaren. Kutanta enda pe piah termurmur me kuta si man kebiarenken. Adi bage nge kecibal kutanta asa ndigan pe labo banci maju.” Sinik kalak kerina. Pengulu pe tempa nggunaken waktu e nehken petuahna. “Lanai jamanna kita bangga adi kalak mbiar man banta ban kinirawanta. Arimo ma merawa nge, tapi nen kena wari ku wari reh mencurna bilangenna. Lembu ras biri-biri labo merawa tapi reh teremna beliganna. Adi bagenda-bagenda ngenca pemetehta ibas jaman si genduari enda nandangi murde me kita kerina.” Rempat sinek pengulu. Igejapna ia nggo mbuesa ngerana. “Engko Mintes, adi labo sengaja, ma banci nge imaafkenmu si Rembang?” Lnga pe ijawab Rembang mis ka teruskenna. “Engko Rembang adi ban silap nge Mintes maka isakkenna engko, ma labo nari nari sangkut ukurmu?” Sinik duana kalak ndai. Si enterem pe tempa merincuh megi jabab kalak enda. Kenca sora kai pe la terbegi. “Adi mehuli ukur kena mis kena ngerana. Aku la terkena ndekah-ndekahsa ncakapken sibagenda. Si ergan kita. Adi la kena nggit duana ngerana gelah sisehken ku aparat keamanan.” Sitatapen kalak kerina. Sidua kalak e pe bagi si sengget. “Eah rukur kena duana,” nina sekalak perbapaan. “Engko lebe ndedeh nahe Mintes, uga nim Rembang?” “Nggit Bulang.” “Engko Mintes?” “Nggit Bulang.” Bageilah, nina kalak kerina janahna tepuk tan. Lit ka si surak. Iangkat pengulu tanna. Sinik kerina. “Engko Rembang, tandaim ka nge Pa Gedang?” “Tandai Bulang.” “Kadem e?” “Bapa tengahku.” “Siparibanen kal Pa Tengahmu rasa bapa Mintes e, lah enggo tehmu.” Sitatapen kalak kerina. “Enam ia, enggo sikenan lebe maka sintandan. Mis serentak piga-piga perbapaan ipetedisna ras ipejumpakenna sidua kalak e. Bagi anak-anak kitik suruh sisalamen bage me kalak e. Sidakepen ia ras ngataken maafna. Siang ayo kerina si pulung. Tangkas kel terbegi gendang kerja tahun e erbolo-bolo. Singuda-nguda anak perana paken adat sangana sisegeren. Meriah surak si natap. (Turgen enda sada pesan man banta ngadapi Pilkada si reh enda. Ulanai min Karo itandai ibas stigma negatif. Mari si Bayu keersadaan ras kwalitas SDM-ta si mehuli). Sumber: Tabloid SORA SIRULO XII (November 2007)